–

–

بعد مانتا قررت ماتعش بدون هدف ويبقى ليك غاية في حياتك … حبيت أشارككم ببعض النصائح في سبيل تحقيق هدف انت بتسعى ليه في حياتك

–

كل حاجة بإيد ربنا

أول حاجة وأهم حاجة  انك تتأكد وتتيقن ان كل حاجة بإيد ربنا وانك لو اتنطط ومشيت على إيدك وعملت كل حاجة في الدنيا وربنا لسه مأذنش يبقى مش هتحصل على الحاجة دي … إدعي ربنا جااامد انه يوفقك ويكرمك ويرزقك … سبحانه وتعالى أغنى الأغنياء وبيحبك تسأله عشان يديك … واوعى في لحظة من اللحظات تعتمد أو تتوكل على عبد من العباد أو تركن إلى ان ربنا مديك شوية اسباب … اوعى لو انت مذاكر كويس تخش الامتحان وانت معتمد على المذاكرة بتاعتك … دايما بص للأسباب على انها شوية جنود وربنا مسخرها ليك

–

الطريق ليس ورديا

دايما خلى عندك أمل لحد آخر لحظة, حافظ فعلا على ان تكون نفسيتك مرتفعة, متخليش الأوقات الصعبة تقتلك وتخليك تقرر انك فاشل أو عاجز أو مش هتقدر, قول لنفسك واقنعها دايما انك مش أقل من اللي بيحققو أحلامهم, ربنا ماداهمش حاجة زيادة عنك , استعد دايما على ان هيبقى في أوقات في سبيل تحقيق هدفك هتبقى ضلمة   -بلاش تشاؤم, خليها كحلي- فعلا ياجماعة هو ده الطبيعي, هو ده النجاح الحقيقي انك تعرف تعدي من اللحظات اللي نفسيتك فيها هتبقى تعبانة جدا … التعب الجسدي كلنا تقريبا ممكن نستحمله … بس مش كلنا ممكن نستحمل الضغوط النفسية

–

 ركز في حاجة واحدة … انت مش سوبر مان

دايما أول خطوة تعملها انك تبدأ تقسم هدفك لشوية خطوات وأهداف أصغر متبصش على الهدف الكبير على بعضه وتقول صعب جدا … وانت بتنفذ كل خطوة من الخطوات الصغيرة متشغلش دماغك بالخطوات التانية … ركز بس في اللي انت فيه دلوقتي وخلصه واعمل أقصى حاجة ممكن تعملها في الخطوة الحالية …

–

خليك سياسي مع نفسك

دايما حاول تضحك على نفسك, قولها ان هي كويسة حتى لو هي مش كويسة, قولها “انتي كويسة جدا”  في الأوقات اللي هي هتبقى محبطة جدا ومعندهاش ثقة بنفسها فكرها بالحاجات الحلوة اللي هي عملتها قبل كده  وعرفت تعملها, عامل نفسك وكإنها طفل صغير, اضحك عليها, لما تعمل حاجة كويسة وتنجز كافئها, ولما نفسك تبقى حاسة بقى انها جامدة أوي وهتتغر في نفسها, امسكها هزأها, فكرها بقى ان لسه قدامك مشوار كبير, خليك سياسي مع نفسك

–

–