–
أخي الفاشل, أختي الفاشلة … أقدم لكم الاثنا عشر نصيحة الذهبية في طريق الفشل …
- من أهم النقط عشان تبقى انسان فاشل, انك متبقاش عارف نقط قوتك, ودايما تقيس نجاحك وفشلك بإنك تحط نفسك في مقارنة مع الناس وتشوف إن هم ناجحين وانت “فاااشل” … في حين ان ممكن لو غيرنا الحاجة اللي بنقيس عليها النجاح والفشل تبقى انت فعلا إنسان ناجح جدا … بس نصيحة مني, لو عايز تيقى فاشل, “دايما قارن نفسك بالناس, واحكم على نفسك بالفشل”
– - خلي حياتك ماشيه من غير أي خطة, من غير أي أهداف, من غير أي طموحات … أرجوك! لو عايز تبقى انسان فاشل عيش زي مالناس عايشة … عيش “عادي” ………. و “موت عادي”, بس عشان تبقى فاشل أصلي, انسى موضوع انك هتموت “عادي” ده.
– - حاول تعترف وتقول لنفسك انك “فااااشل” … كررها … قولها كتير, قول “انا انسان ضعيف” … قول “حاولت كتير” … قول “مش هعرف!” كرر الكلمات دي لحد مايبقى عندك إيمان داخلي بإنك فعلا إنسان فاشل, افقد الثقة في نفسك تماما, حاول بس, افقد الثقة في قدراتك العقلية ومواهبك …
– - اقعد دايما بص على الناس اللي أحسن منك في حاجة معينة, وقول لنفسك “اشمعنى هما؟؟؟” … قول “ربنا أكيد بيحبهم أكتر مني” … قول “محظوظين!” … حاول متفكرش إيه السبب المنطقي العقلاني اللي ورا نجاحهم, متحاولش تعرف هما تعبو أد ايه وعملوا ايه عشان يحققوا أي حاجة … عيش بتتفرج على الناس … وموت وانت بتتفرج عليهم بردو
– - حاول دايما تبص على الجزء الفاضي اللي في الكباية, وتخلى حالتك النفسية في الأرض, ومحبط, ويائس, حاول متقولش لنفسك, “زي ما فيه حاجة وحشة, فيه حاجااااات كويسة” … لازم تحافظ على موت الروح النفسية
– - من أهم النقط المعينة على طريق الفشل هو “الخوف” … الخوف من كلام الناس, الخوف من المحاولة, الخوف من التجربة, الخوف من ان الناس تقول عليك “فاشل” … أو يتريقوا عليك, أو يقولوا عليك “جاهل” … خليك دايما خايف تاخد أي خطوة تصلح بيها نفسك.
– - أبوس ايدك, اوعى تتعلم من أخطائك السابقة, اوعى بعد ماتغلط تعد تفكر إيه اسباب الفشل أو ليه انت غلط, اوعى تشغل مخك اللي ربنا اداهولك, اقعد كرر نفس الخطأ 100 مرة, عيش حياتك بسزاجة كده, بعد أي حاجة غلط في حياتك, قول “قضاء وقدر” من غير ماتشغل مخك خالص …
– - “الهري سبيل الفشل” … اتكلم كتير, ضيع وقت كتير, اقعد على ال face و twitter و العب games واخرج مع اصحابك واتفسح و “اهري” … اقعد اهري في الوقت لحد مايدوب خالص, اتكلم كتير واشتغل قليل … أو متشتغلش خالص.
– - يبقى من أهم نقط الفشل, انك تعتمد تماما على نفسك وتركن لقوتك ومتسألش ربنا انه يعينك ويوفقك
–
- أخطر حاجة ممكن تبوظ خطة الفشل, انك تصاحب ناس كويسين, إيااااااااك, ابعد تماما عن الأصحاب الكويسين, اوعى تصاحب الناس المتفائلة اللي بيشتغلوا وبيتعبوا وليهم أهداف, ابعد عن الناس دي خالص, حاول دايما تصاحب الناس بتوع الهلس, وناس فاشلة بردو وكده, هتسألني “ليه؟” … هقولك ليه, ميزة الاصحاب ذوي الهمة الواطية, ان هما يحسسوك دايما انك مش الوحيد الفاشل اللي في الدنيا, وان الدنيا لسه فيها فشل, ولو معرفتش تلاقي أصحاب بتوع هلس وتضييع وقت, خليك انطوائي ومنعزل عن العالم.
– - من الحاجات بردو اللي هتساعدك في طريق الفشل, انك تدور دايما على مبررات لفشلك, دو على شماعة تعلق عليها فشلك بمجرد ما الحتة اللي لسه صاحية من ضميرك تيجي تتنفس, اكتم على نفسها بالشماعة دي, أمثلة للشماعات الكويسة (“ربنا خلقني كده!”, “انت مش شايف حال البلد!”, “حاولت كتير ومفيش فايدة!”, …)
– - دايما قول لنفسك, “لسه العمر طويل”, “لسه بردي”, “بكرة ربنا يصلح الحال”, … خلي العمر يعدي كده, يوم ورا يوم, شهر ورا شهر, سنة ورا سنة … خلى التسويف سلاحك وعنوانك
–
أي حد يحب يفيد اصحابه ويضيف نقطة للفشل, ممكن يضيفها في كومنت!
–
–
Amr Abdulrahman 
لو لقيت حد بيسمعك كتير ، خلى كل حل يقولهولك مش نافع ، خليه يحبط معاك هو كمان 😀 وتبقى سبب في فشل واحباط غيرك
ليه تفشل لوحدك لما ممكن غيرك يفشل معاك؟!
Golden. 🙂
كره نفسك في اي حاجة بتعملها
ناام كتييير و فضل الراحة عن الشفل
😀 😀 😀
Brilliant!! 😀
I do Like 🙂
شتت نفسك بين 50 ألف حاجه … فمش هتعرف تعمل منهم ولا حاجه
وبالتالى هيجيلك احساس الفشل لغايت عندك 😀
عدم النوم انا عايزك كده ما تنمش علطول 🙂
واسهر كتير عشان تبقي انسان فاشل كده ومتهتمش بعدد ساعات النوم المطلوبه للعقل والفكر